K O M E D Y J O W C Z T Y R E C H A K T A C H
WET ZA WET
CZYLI „ZEMSTA” po ślôńsku
(SZTUKA NA PODSTAWIE KOMEDII A. FREDRO — ZEMSTA)
Na nasze przełônaczôł Czesław Śpiewok
Wystympujôm:
Cześnik Raptusiewicz
Klara
Rejynt Milczek
Wacław, syn Rejynta
Podstolina
Papkin
Dyndalski — kamerdyner
Śmigalski — dworzan
Perełka — kuchmistrz
Mulorze
Dworzany
AKT I
SCENA I
(Stary dworek szlachecki. Cześnik. Dyndalski)
Cześnik
(Łobleczôny jak szlachcic, siedzi za stołym, przeglôndo dokumynty)
Mocium panie! Tela kasy!!!!
Dobro ziymia, no i lasy!
Mo folwarki — czynsze spore!
Sama zwiyndnie, to jest chore!!!
A te cycki, a tyn zadek!
Dyndalski
Ale gdowa…
Cześnik
Jeszcze spadek!
Klara młodo, dość powabno,
Podstolino dalij zgrabno…
Klary włości to rzecz ślisko,
Roz nie trefia — pośmiywisko!
Podstolino kasôm trzepie,
Nie skorzystać? Pusto w łepie
Dyndalski
Łôna o czymś wiyncyj marzy!
Tako wrzawo że sie sparzysz!
Cześnik
Już nie młodo — ale warto
Zagrać tôm diobelskom kartom!
Dyndalski
Tyś nie młody!
Cześnik
Tyś je młodszy?!!!
Dyndalski
Podstolinej bôłby słodszy
Ktoś kto kochać umi sprawnie
Cześnik
Już nie bulkej, bo zabawnie
chned sie skôńczy, bydom puki!!!
(z groźnôm minôm chyto za szabla)
Dyndalski
Czyś nie dostoł już nauki?
Mosz podagra!
Cześnik
Ech, czasami.
Dyndalski
Durś futrujesz się lykami,
Choćbyś zeżar cało viagra,
To zwyciynży Cie podagra!
Sztywnyś w krziżu!! … reszta leży!
Nie wytrzimiesz dwóch pacierzy!
No, a takij starej mutry
Nie chytej bez Kamasutry!
Cześnik
Posadza se jôm na klinie…
Nic nie słychać o Papkinie?
SCENA II
Cześnik, Papkin.
(Papkin — łobleczôny po francusku, krôtki galotki, szczewiki z maszkami, hut i szpada)
Papkin
Wybocz Panie môj, Cześniku, boch kłopotow
mioł bez liku
Konie padły. I kolaska!
Cześnik
Godej wartko mi do diaska!
Szoł żeś piechty! Za to ryncza.
Papkin
Wybocz Panie, że Cie myncza,
Ale całe Twoje złoto
Kanś mi pitło, wpadło w błoto,
Jak napadli na mie zbóje,
Jo ich wszystkich rozharatoł!!
Cześnik
Ty se myślisz żech je matoł?
Skôńcz już fulać, bo Cie szczela!
Papkin
Piiiiiić....bo pragna jak kamela!
Jak mi nie dosz, wyschna cały.
Co tak wybałuszosz gały?
Złota ni ma, wôniej flinta!
Cześnik
(wônio lufa flinty, potym Papkina)
Tyś nie szczyloł, tyś je tinta!
Wybroł żeś sie na sex party
Aboś wszystko przegroł w karty!
Papkin
Mój Cześniku, kônôm z głodu!
Tydziyń lecioł żech do grodu,
Tydziyń dieta żech stosowoł.
Cześnik
Boś pieronie kańś sie schowoł!!!!!
Moga zamknônć Cie do ciupy!!
Papkin
Skuli czego??
Cześnik
Twojij dupy!
Bo sie czynsie i strachliwo!!!
Papkin
…Miołbyś jeszcze jedne piwo?
Cześnik
Ciszyj! Patrz jak długi spłacać!!
Papkin
Jo sie yno….. nie chcioł wracać…
Wszystko! Jutro! Jak tu stoja!
Jo niczego sie nie boja
Patrz na moja szpada krwawo!
Na fechtôngi! Bij mi brawo!
Cześnik
Zawrzij Papkin wreszcie japa, ledwo stoisz już na szłapach!!!
Trocha Cie tu potrynuja,
Wyciông karty, boś ty szuja,
Przegrosz wszystko, dowôm słowo,
Los pisze historia nowo,
Rozdej karty, czort tu monci.
Papkin
Czuja sie już jak na pônci!
Prawie świynty, prawie w niebie
Karty śmiejôm sie do ciebie,
Ale Papkin — zno fortele,
Cześnikowi spadnôm brele!
(rżnom w karty”
leci piosynka
Cyjna, dupek, szel i as
I
Za wsiôm leżoł folwark stary, kupiôł go wiync łojciec Klary
Tam miyszkały yno sowy, mioł tyn folwark do połowy.
Drugij czyńści czort dziedzicym, mo go facet z bladym licym
Słodki, cichy. To obłuda, zrobić umi czorne cuda
Refren
Cyjna, dupek, szel i as /x4
II
Łojciec Klary, chocioż stary, kwity przegroł z tym chacharym
Folwark zostoł podzielôny bo mioł długi z kożdej strony
Mur na placu postawiôny, wiync jest Rejynt z drugij strôny
Cześnika już czynsie febra jak się pozbyć tego lebra
Cześnik
(wali rynkôm w stôł, w złości)
Poła zamku????!!! — kôniec wreszcie,
Choćby zawar mie w hereszcie
Rejynt Milczek — cwane bydle,
Tu — ujedzie jak na mydle,
Jak trefiôny na zol padnie!
Jo Go zdusza, bydzie na dnie!
Bo mie straszy sztyjc sôndami,
Bez to skończa z chacharami!!!!!
Papkin
Ale ni ma u Was zgody,
Wiela jeszcze spłynie wody?
Cześnik
Już nie dużo, sprawa świynta
Jo Cie pośla do Rejynta!
Papkin
Mie chcesz posłać do Rejynta?
Wiysz że zabić gizda moga?!
Bestôż u mie tako trwoga!
W lochach spyndza reszta życio,
Nic już ni môm do ukrycio.
Mie za posła?
Coś Cie gniecie?
Nic Ci po mie w całym świecie!
Cześnik
Biera na sia wszystki słowa!
Bydziesz czyste mioł sumiynie.
Teroz słuchej mie łod nowa
Cołkiym nowe dom zlecynie.
Mocium Panie.....Jo sie żynia
Papkin
Co, co?
Cześnik
Co, co.
Papkin
Ty się żynisz??!!!
Cześnik
Nooooo… Tak jakby, tak po prowdzie…
Papkin
Z kierôm babom, czyś łoszaloł?!
Cześnik
Coś żech Ci za mało naloł!?
Podstolino môm na myśli
Słôw bych do Nij pora skryślił
Ale Ty byś sprawa zaczôn,
Mie coś… szabla lepij idzie.
Papkin
Ida!
Cześnik
Kaj zaś?
Papkin
Zaro bydzie!
Cześnik
Czekej na Nia aż tu przidzie!
Papkin
Coś nie bardzo amant z Ciebie.
Cześnik
Przi Nij bydzie mi jak w niebie!
Jak pomożesz spełnić plany
Dziynnie bydziesz tu naprany
Gônsior bimbru dom Ci za to,
Wczasy w Bełku zaś na lato!
(wychodzôm, Cześnik piyrszy)
Papkin
(do siebie)
Stary pajac już się ślini,
Podstolino chciołby w mini,
Podstolinej wlyź do łôżka,
Chocioż w gaciach mo wydmuszka!
Zrobia wszystko co w mej mocy
Żeby Łôna była w nocy
Chocioż w życiu roz szczynśliwo!!!
Choć mo głowa trocha siwo,
To niech pozno smak miłości
I rozgrzeje stare kości.
Niech se Cześnik Viagra łyknie,
Yno jedna!!!!, bo to styknie
SCENA III
Papkin
( stoi z gitarôm i śpiywo)
Posłuchejcie mojej pieśni,
Cześnik szaszek, raptus Cześnik,
Swiat by zwyrtnôł blank do zadku,
Żeby dostać coś we spadku.
Jednak pryndzyj sie uwina
I Mu wcisna Podstolina
Niech Mu sporo zado bobu
I zostanie z Nim do grobu.
Jo zaś Klara môm na łoku
Chodza za Niôm po cimoku,
I wiym dobrze że niy darmo,
Cześnik pynknie — bydzie larmo!
Klara śpiywym słodkim zwabia,
Niech se myśli żech je hrabia.
Zaroz byda nuciôł sôngi,
Jak zaś przidzie — to sztelôngi,
Spiyrwa całus — pójdzie gładko,
Byda mioł potômstwa stadko!!!!
SCENA IV
(Papkin, Podstolina
Papkin dalij brzdynko na gitarze)
Podstolina
Co tak miałczy już godzina?
Chyba słysza tu Papkina
Papkin
Podstolino — cnoty wzorze
Pôł godziny jo na dworze
Chwola Ciebie, Twoje wdziynki
I wychwolôm Twoje cnoty
Podstolino
Ni mosz inkszej to roboty?
Szkoda czasu, wartko godej
Papkin
Jo chca Ciebie, babki młodej!
Ze figurôm tak ponyntnôm
Że mi chyba żyłki pynknôm —
Jak nie sprostosz mojej chuci!
Nie chca Cie już bałamucić,
Yno musza to wystynkać:
Cześnik prosi Cie o rynka.
Swojôm kasôm Mie pokôno,
Musisz zostać Jego żonôm!
Podstolina
Beztôż Ciebie posłoł w swaty?
Papkin
Bo łôn kocho, lecz na raty,
Trocha w wieczôr, trocha rano,
A to rzecz je niesłychano
Żeby Viagra — tako mało,
Cztyry razy przekroć nożym?!
Sknyra chce być byczkiym hożym!!!
Podstolina
Ale przeca mo aptyki,
A zaś na to sôm już lyki.
Zarynczyny możesz głosić,
na wesele gości prosić (wyłazi z izby)
Papkin
(do siebie)
Podstolino mo żałoba,
A nie minie jeszcze doba
Jak te babsko ruszy w tany,
Pokrziżuje moje plany!!!!
SCENA V
(krziwym krokiym wchodzôm na plac mulorze — pod kôniec pieśni zejrzy ich Cześnik.
Cześnik, Papkin. Cześnik zaglôndo bez łokno, Papkin siedzi przi stole)
I
Problymôw się ciôngnie cały sznôr
Bo postawiôł Rejyncina mur
2x/ Prawie całkiym nowy, bôł już mur gotowy,
Wartko w nocy co widziały sowy
Ref.
Mur, mur, rośnie wielki mur
Ale pełno jest w nim dziur.
Bez nie Wacław lotoł sztyjc do Klary
Cołkiym jasne mioł zamiary
II
Mur by Cześnik cały chcioł łobalić
A Wacława Rejynt chcioł ocalić
2x/Tyn zaś patrzy z gôry, szuko w murze dziury
No bo Klara dziynnie czeko tam
Cześnik
Stowej wartko, kaj mosz szabla?
Dować flinta, stawiej gabla!
Papkin
Coś Cie pizło?
Cześnik
Stowej zaroz!!!!!
Papkin
Czy Cie wiater dmuchnôł naroz?
Cześnik
Mur murujom tam mulorze!!!!
Papkin
Mie chcesz zabić? O mój Boże!
Cześnik
Mur naprawio jakoś zgraja!
Zrôb mi Rejyntowi chaja!!!!
Papkin
Zburza,… zniszcza…,
Cześnik
Dowosz słowo?
Gôń mulorzy, zrob tam bajzel!
Wyrwij kielnia, wyrwij majzel,
Gôń ta zgraja do Rejynta!
Mur mo leżeć — to rzecz świynta
Papkin
Ale,...ale Moja szpada…
Cześnik
Zaruściało?!!!
Papkin
Yno trocha…
Cześnik
Ruszej wartko, stônd wynocha!!!!!
SCENA VI
(Klara, Wacław w ogrodzie wele lauby. Z jednej strôny bydzie widać Rejynta a z drugij Cześnika)
Wacław
Tak nôm blisko, a daleko
Przepaść dzieli, choć mur mały.
Tak nôm krôtko być ze sobôm,
Jedna chwila — dzionek cały
Klara
Byłach w laubie, stołach przeca!
Wacław
Widzieć Ciebie? To za mało!!!!!
Klara
Môj najdroższy, co sie stało?
Gaśnie coś Twôj zapał szczery,
Na co wszystkie te bajery?
Wacław
Chciołbych Klaro pieścić Ciebie
Chciołbych żebyś była w niebie,
Chciołbych pieścić Twe paluszki,
Chciołbych chycić za cycuszki!
Klara
Och, Wacławie, już môm drgawki
Wacław
Jo zaś chyba dostoł czkawki.
W nocy mynczôm mie omamy,
Bez dziyń chodza jak naprany.
Już niy moga, niech tu skônôm,
Łostôń Klaro mojôm żonôm!
Klara
Jak to zrobić?
Wacław
Cześnik zmiynknie?
Klara
Pryndzyj to Mu serce pynknie.
Wacław
Nô to chyba żyć przestana!
Klara
Ciii, ktoś idzie,… to do rana!
Wacław
Dej mi Klaro choć całuska!
Klara
Jutro Mi rozepniesz bluzka.
SCENA VII
(Papkin, Śmigalski, pora służôncych z knebulcami, potem Cześnik i Rejynt)
Papkin
Sztopnij majster, zwijej graty,
Niech pomogôm Ci kamraty!
Biercie piôny młotki, kielnie
A jo przi Was byda dzielnie
Jak swijocie się… filowoł,
Trocha żech sie za mur schowoł…
Co za banda! Chyba gucho!
Żodyn dzisioj mie nie słucho.
Weź Śmigalski, lyj po krziżu!!!!!
Jo zaś byda tu w pobliżu,
By Ci żodyn tu nie skrzeczoł
Jo Cie byda ubezpieczoł
Śmigalski
Jazda mi stônd! Wôn!! Wynocha!!!
Papkin
(wystraszôny patrzy w łokno, godo do siebie)
Cześnik w łoknie szczylo focha…
Śmigalski
Biercie swoje dupy w troki!
Jeszcze chwila, bydom zwłoki!!
Rejynt
(wyłazi z głymbi scyny)
Co zaś tukej, co to znaczy???
Śmigalski
Cześnik, szef môj kozać raczôł
Żeby nie kôńczôno muru!!
Rejent
Czyście sie nażarli żuru??!!!!
Brać sie nazot do roboty!
Cześnik
(we łoknie)
Coroz wiyncyj tu chołoty!!!
Bij Śmigalski!!!!!, pier po krziżu!!!!!!!
Papkin
Jo zaś byda tu w pobliżu…
Rejynt
Kup książkę, aby przeczytać do końca.